Sapuluh Tapak Budaya Banten (Bubuka)

Bubuka

Dina bab bubuka ieu, penting urang ngamukadimah heula wacana memeh asup ka substansi. Urang taraman ku hiji fenomena nyaeta, nepi ka denget ieu loba keneh urang Banten nu can nyaho sajarah lemburna nu geus jadi provinsi ti taun 2000. Ari alesan kunaon matak tulisan ieu ku kami diturunkan deui di wahana ieu, aya kahayang milu cacahan dina raraga nyanghareupan “Kongres Rakyat Banten” nu ceuk katerangan ti surat kabar mah bakal diayakan di awal taun 2014. Susuganan naon nu dipikahayang rahayat Banten jaga, boga cecekelan keur nempo kaayaan urang Banten baheula, memeh ngasakkeun kahayang atawa cita-cita ka hareupna.

Kuhayang-hayangna kami ngilu bungah ngariung mungpulung ngaramekeun sawala rahayat wewengkon nu dipikacinta ku urang kabehan, atuh media Website Banten Heritage sugan bisa jadi cukang nu bisa nepikeun pependakan atawa pamikiran kami sautak saeutik ka rahayat Banten hususna, atuh kitu deui ka dulur-dulur di tatar Sunda nu aya di Provinsi Jawa Barat jeung DKI Jakarta. Kaasup di jerona sebrangeun kulon Banten nu kasebut Lampung.

Kukituna hayu urang taraman nyaliksik tatapakan sajarah Banten dimimitian ti jaman nirleka (samemeh abad masehi) nepi ka ngadegna Provinsi Banten. Bari nungguan panalungtikan para inohong sajarah, aya hadena urang pedarkeun saayana, sabab nungguan rengse panalungtikan mah moal aya anggeusna. Ceuk jenatna guru kami, Prof. Ayatrohaedy nu katelahna Mang Ayat tea, salah saurang pakar Arkeologi jeung Linguistik Kasundaan, “Kuari tulis baé heula, nu penting mah urang Banten kudu ngabogaan buku sajarah sorangan. Bener henteuna urang pasrahkeun ka rahayat jeung para ahli séjén sinah nyiaran sumber sajarah nu leuwih lengkep, susuganan aya”. Matak kuari dadasar kana sumber nu aya bae heula, sugan ringkesan ieu bisa jadi tuturus ngalengkah kana sajarah nu rada lengkep.

Ngan hampura ka dulur-dulur kami di mana  bae ayana, kami teu bisa make basa nu “nyastra” dina tulisan ieu. Kahayang kami, ku make basa sapopoe jeung teu ngahulu kana undak-usuk basa, sugan bisa nguatkeun Sunda jadi basa populer. Pan sakumaha nu sok ditepikan ku batur, mun basa Sunda dialek Banten mah kasohor ku sipat egaliterna.